مِداد

هشام شكرالله

مؤسس مِداد

من سنين وأنا مهتم بتغيير العادات والإنتاجية، وجربت تطبيقات وأدوات كتير في المجال ده. لكن كان فيه حاجة ناقصاني دايمًا: كل الأدوات دي بتنظملك وقتك، لكن من غير ما تربطه بأي معنى أعمق. حسيت إن السؤال الحقيقي مش "هل أنجزت مهامي؟" لكن "هل أعمالي دي بقت عبادة؟"

من هنا جت فكرة مِداد: بدل ما رتب يومي على الساعة، أرتبه على مواقيت الصلاة — بعد الفجر، بعد الظهر، بعد العصر — عشان يفضل يومي كله مربوط بحاجة أكبر من مجرد قايمة مهام.

قررت الرحلة تكون ٦٠ يوم، وقت كافي تكوّن فيه عادة حقيقية من غير ما يبقى الالتزام تقيل عليك. وبعد شهور من التصميم والتجربة، طبعنا أول ١٠٠ نسخة بأيدينا، وبدأت توصل لأول مجموعة من الشباب المسلم. وحد منهم، طالب ثانوية عامة، قالي إن مِداد ساعده يخرج من العشوائية ويربط مهامه بمواقيت الصلاة — واللحظة دي بالذات هي اللي أكدتلي إننا ماشيين في الاتجاه الصح.